Pituffik Space Basemi attaveqaatitigut pilersuinissamut isumaqatigiissut
Asseq: saamerlermiit: Tusassimi pisortaaneq direktør Kristian Reinert Davidsen, Inussuk A/S pisortaaneq Jeppe Bloch Steffensen, Tusass Siulersuisuni siulittaasoq Ulrik Blidorf, Tusass Wholesalemi pisortaq Flemming Drechsel.
Inussuk A/S Tusassilu, Pituffiup oqarasuaatitigut, internetikkut datakkullu kiffartuunneqarnissaanut kiisalu KNR radiokkut tv-kkullu attavinnut 2033-p tungaanut isumaqatigiissuteqarput. Nunatsinni Amerikamilu oqartussat, Pituffik Space Basemi suleqatigiinnermik ingerlatsisut isumaqatigiissut pillugu ilisimannipput.
Isumaqatigiissummiipput Tusassip Pituffimmi OneWeb atorlugu qaammataasakkut attavinnik pilersuigallarnissaa, kiisalu Tusassi Inussuk A/S peqatigiillutik GreenSAT-mut nunami tigooraavimmik Pituffimmi 2024-p aasaanerani pilersitsinissaat. Tassa imaappoq ukiaru Pituffimmi internetikkut piginnaasat annertunerusut periarfissaalissapput, Tusassilu Pituffimmi atuisunut flatratemik neqeroorsinnaalissalluni, soorlu Nunatta sinnerani najugaqarfinni tamani aamma tamanna periarfissaasoq.
Qaammataasanut tigooraavik sananeqartinnagu Pituffimmi kiffartuussineq ullumikkumiit allannguuteqarpallaassanngilaq, isumaqatigiissutilli qulakkiissavaa Tusassimiit basemi oqarasuaatikkut attaviit 4G-usoq ingerlatiinnarnissaa ineriartortinnissaalu. Kiisalu KNR radio tv-milu kanalit tusarnaarneqarlutillu isiginnaarneqarsinnaanissaat, soorlu Nunatta sinnerani aamma taamaattoq.
Tusass Wholesalemi pisortaq Flemming Drechsel, oqaaseqarpoq: Tusassimut pingaaruteqarsimavoq Pituffik Space Basemi nutaaliaasumik qaammataasakkut aaqqiissummik neqeroorsinnaanissaa, soorlu ukiuni kingullerni Tunumi Qaanaamilu antenneqarfinnik sanaartortoqarsimasoq, Tusassip nammineq aningaasaliiffigisaanik. Taamaattoq aamma uagutsinnut pingaaruteqarsimavoq Pituffimmi suliatta aningaasaqarnermi piujuartussamik ingerlanneqarsinnaalernissaa, atuisutsinnullu allanut sunniuteqannginnissaa. Isumaqatigiissutip nutaap qulakkiissavaa ingerlatsinerup oqimaaqatigiissaarneqarnissaa, siunissamilu Pituffiup attaveqaatitigut pilersorneqarnera sapinngisamik pitsaasuunissaa qulakkeerusupparput.
Inussuk A/S pisortaaneq Jeppe Bloch Steffensen, oqaasertaliivoq: Nuannaarutigaarput Pituffimmi suleqatitta siunissaq ungasinnerusoq eqqarsaatigalugu oqarasuaatitigut internetikkullu attaveqarnissat kiisalu basep Nunatta radioanik tv-anillu tigooraasinnaanissaa qulakkeerneqarmat. Tusassip isumaqatigiissuteqarfigineratigut tatiginartunik Nunatsinneersunik pisiortorfeqalernerput aamma naleqartippara. Taakkuuppummi ukiorpassuarni Pituffimmi issittumi, pissutsinilu sakkortuuni attaveqaatitigut kiffartuussinikkut misilittagallit. Naatsorsuutigisinnaavarput Tusassip nutarterinerit basemilu attaveqaatitigut pilersuinerup aserfallatsaaliortarnissaa, teknikkikkullu ajutoortoqartillugulu sukkanerpaamik aaqqiisarnissaq pingaartittassagaat. Nalunngilaralu suleqatigut ukiaru qaammataasatigut piginnaasat nutaat atuutilernissaannut internetikkullu pitsaanerusunik neqerooruteqalernissaanut qilanaartut.
Tusass Nunarput tamakkerlugu telefoneqarnermik internetimillu tuniniaasuuvoq aammalu poortukkanik allakkanillu isumaginnittarluni.
Tusassimi sullitat pitsaanerpaamik misigisaqarnissaat qulakkeerinneqataaffiginiarsarisarparput, Nunatsinnilu innuttaasut pillugit sapinngisamik eqeersimaartuulluta.
Silarsuaq qaninnerulersipparput – immitsinnullu qaninnerulersilluta.
Inussuk A/S Pituffimmi aserfallatsaaliuilluni kiffartuussillunilu suliassani 1. oktobari 2023 aallarnerfigalugu tiguai. Inussuup suliassani naammassiniagassani suliffeqarfiit Kalaallit Nunaanneersut peqataatinneqartarnerat nukittorsarusuppaa, tassanilu suliassat ilagivaat attaveqarneq qarasaasiaqarnerlu isumannaallisagaanngitsoq.