Pituffik Space Basemi aasarinnera
Eqqiaasutta Rosa Kanuthsenip kusanartunik kalaallisooqarluni erfalasoq amuvaa
Sivisuumik ukiorlunilu kaperlareernerata kingorna seqineq kaaviinnalertarpoq tarrissaarluni. Taamaasigaangallu inuit silamiinnerulertarput. Nukissamik nutaamik aallerfiusumik ataatsimuualaarnerit pilersarput, nuannisarnerlu ataatsimuualaarnernit aallaaveqartunit annertusisarluni.
Pituffik Space Basemi inuiattut ullorsiorneq
Ukiorpassuarni sakkutooqarfimmi Kalaallit inuiattut ullorsiornissaat nalliuttorsiutiginiarlugu aaqqissuussineq innuttaasut siulersuisuinit sumiiffimmilu suleqatigisat peqatigalugit aaqqissorneqartarpoq.
“Ukiuni kingullerni maluginiarparput nalliuttorsiornermut peqataasut amerliartornerat, ukiormannalu ukioq kingullertuulli peqataasut 200-300 missaanni amerlatigipput. Pituffimmi innuttaasut amerlassusaat sanillersuutissagaanni tamanna nuannerluinnarpoq. Ukiuni kingullerni piniartut peqataaniarlutik tikittartut aamma amerliartorput. Pilersaarutit takusimallugit tusarsimallugilluunniit ilaquttatik nassarlugit tikittarput. Peqataanissaannut tikilluaqqusarpagut peqataanerallu ulloq nuannernerulersittarpaat. Ajoraluartumik nunaqarfimmiut peqataanissaannut siku ajornartorsiortitsisimavoq tikinngitsoorlutillu, neriuppugulli aappaagu nalliuttorsiornermut peqataasinnaassasut. Ukioq manna ileqquusut malillugit Dundasimi erfalasoq amuneqarpoq, tamannalu immikkoortortani assigiinngitsuni pisortanit peqataaffigineqarpoq. Tamarmik sulisutsinnit kusanartumik kalaallisoortumit tikilluaqquneqarput. Erinarsortoqarpoq, oqalugiartoqarpoq, erfalasoq amuneqarpoq taamaasillunilu nalliuttorsiorneq malunnartsinneqarpoq, ullorlu Kalaallit Nunaannut ulloritinneqarluni. Ulloq nuannerluinnarpoq assut seqinnarittoq, qilak allaaqqissoq Pituffik Space Basemilu najugaqartut sulisullu nuannaartut, naammagisimaartut qaaleqqasullu takussaapput” - Flemming H. Jensen, Siulittaasup tullia, Pituffimmi innuttaasut siulersuisui
Nal. 17-imiit 19-imut illuaqqami (katersortarfittut atuuttumi) nerisassanik sassaalliisoqarpoq. Nerisassat Dundas buffet restaurantip sulisuanit, igasut naalagaannit aqunneqartumik, piareersarneqarput sassaalliutigineqarlutillu. Ileqqut malillugit kalaaliminerpassuaqarpoq, soorlu mattaat, suluppaagaq, nataarnaq, raajat, tuttup suppaa, aalisakkat suppaa aamma tuttup quttoraa qitialu. Nutaanik usseerusuttunut appaliarsuit suli meqqullit misilinneqarsinnaapput. Usseerusussuseqanngitsunut pølsit grillimi kissatat nerineqarsinnaapput namminerlu burgeriliorluni.
Inussuup Innuttaasut siulersuisui aaqqissuussamut qujaffigerusuppai minnerunngitsumillu sulisutta ikiuunneranut.
Sakkutooqarfimmi arnaqquassaarneq
Juunip 23-ani Pituffik Space Basemi arnaqquassaartoqarpoq. Amerlasuut ikumatitassap ikinnissaanut peqataaniarlutik takkupput. Ikumatitassaq pallenik imaqarpoq aamma qulaani arnaqquassaatut ilusilersorlugu qisummik pilattorneqarsimasoq sanigutini issiasoq takuneqarsinnaavoq.
Ikumatitsinermi malittarisassat sukangasuut malinneqarnissaat qulakkeerniarlugu aamma ikumatitap eqqortumik qaminneqarnissaa qulakkeerniarlugu qatserisartut qatserussuatik nassarlugit peqataapput.
Kingorna ataatsimuualaartoqarpoq peqataasunullu qisummut immullugu iffiukkanik (snobrød) mamarsaattoqarluni.
”Assut nuannerpoq peqataasullu nuannisaqaat” – sulisoq oqarpoq
Sakkutooqarfimmi inuit akornanni oqallinnermi pisut initupput aamma inunnit qilanaarutigineqarsimaqisunit. Misigisat nuannersut ataatsimuualaarnerillu nuannersut sakkutooqarfimmut nuannersumik sunniuteqarput.
Inussuup pisussat piviusunngornissaanut sulisut aamma suleqataasut tamaasa qujaffigerusuppai, minnerunngitsumillu peqataaniarlutik takkussimasut tamaasa.
